Сәрсенбі күні, яғни, 27-наурызда Қаскелең қаласында жаяу жүргінші жолымен өтіп бара жатқан ер адамды көлік қағып, ол сол жерде жан тапсырды, деп хабарлайды Kaskelenkz тілшісі.
Куәгерлердің айтуынша, оқиға таңғы сағат 8 шамасында орын алған. Toyota автокөлігі Абылай хан көшесінің бойымен батыс бағытқа қарай жүйткіп бара жатқанда, жаяу жүргінші өз жолымен жүгіріп өтпек болған. Соққының қатты болғаны сондай, ер адам оқиға орнынан 30 метрдей жерге ұшып кеткен. Зардап шегуші сол жерде есін жимастан қаза тапты.
"Қаскелең автопаркі" мекемесінің жанында болған оқиға орнына бірден жедел жәрдем мен полицейлер шақырылды. Қазіргі таңда жол көлік апатының нақты себептері анықталуда.