Ғалымдар жобаларды халықаралық нарыққа шығару арқылы қосымша табыс алады. 2021 жылы қазақстандық ғалымдардың 15 ғылыми жобасы экспорттаудан 346 млн теңгеден астам табыс түсті.
Білім және ғылым министрлігінің хабарлауынша, ғылыми жобалар Қытай, Ресей, Түркия, Грузия, Чехия, Қырғызстан сияқты елдерге экспортталады.
Мемлекеттік қолдаудың арқасында бүгінде қазақстандық ғалымдар шетелдік ғалымдармен бірге медицина, нано және биотехнологиялар, жасанды интеллект, геология, минералды және көмірсутекті шикізатты өңдеу, ауыл шаруашылығы өнімдерінің қауіпсіздігі және экология саласындағы заманауи жобаларға қатысып жатыр. Барлық жоба БҒМ Ғылым қорының қолдауымен жүзеге асырылды.
Ғылыми жобалардың арасында кобальт-57 радиоизотопы, жел және күн энергиясын өндіретін генераторлар, саңырауқұлақтарға қарсы препарат, медициналық, тағамдық және тұрғын үй-жайларды санитарлық тазартуға арналған биологиялық өнімдер, сүт сарысуы негізіндегі сусындар, пробиотиктер және т.б. бар.
Кейінгі 2 жылда 130-ға жуық жоба қаржыландырылды. Қаржыландыратын қор – ғылыми және ғылыми-техникалық қызмет нәтижесін коммерцияландыру бойынша жобаларды грант қаржыландыру операторы. Бүгінде біз ғылымды қажет ететін 120 өндірісті іске қостық, оның 15-і өнімін экспортқа шығарып үлгерді. Сонымен қатар 1,5 мыңға жуық жұмыс орны құрылды. Зияткерлік меншік авторлары мен ғылыми жобаларды пайдаланатын кәсіпорындар арасында 45 лицензиялық келісім жасалды.
ҚР БҒМ Ғылым қоры басқармасының төрағасы Арын Орсариев
Ғылым қорының қолдауымен «Антиген» ғылыми-өндірістік кәсіпорнының ғалымдары культуралдық вакцина өндіру технологиясын әзірледі. Бұл жоба үй және жабайы жануарлардың құтыру ауруының таралуын алдын алуға бағытталған. Бүгінгі күні вакцинаны Грузияға жеткізу ұйымдастырылды.
Микробиология және вирусология институтының ғалымдары сарысу негізіндегі тағамдық құндылығы жоғары отандық сусын шығаруды қолға алды. Сусынның бүйрек пен бауырдың жұмысына, сондай-ақ бүкіл ішектің жұмысына пайдасы зор. Сонымен бірге ревматизмдегі қабынуды азайтуға көмектеседі, гипертония кезінде қысымды қалыпқа келтіріп, атеросклероз қаупін азайтады.
Қазақстандық ғалымдардың жобасын экспорттаудан 346 млн табыс түсті
2022-04-11 12:21:06
