Үкіметтің қолдауы мен «KAZ Minerals Demeu» корпоративтік қорының 2,9 миллиард теңге көлеміндегі демеушілік көмегі арқасында маңызды инфрақұрылымдық жоба – бүкіл қаланы ауызсумен қамтамасыз ететін бірінші көтергіш сорғы станциясын қайта жаңғырту сәтті жүзеге асты. Атқарылған жұмыстармен облыс әкімі Ғауез Нұрмұхамбетов танысты.
Қайта жаңғыртудың негізгі нәтижелері:
- Су астында да тоқтаусыз жұмыс істей алатын заманауи еуропалық сорғы жабдықтары орнатылды,
- Дизель генераторы ғимараттың жоғарғы бөлігінде су басудан қорғайтын деңгейде орналасты. Басқару пульті де қауіпсіз биіктікке қойылып, қашықтан басқару режимінде жұмыс істейді,
- Биіктігі 4,7 метр болатын темірбетонмен күшейтілген габион бөгеті салынды.
Тұрақты электрмен қамтамасыз ету мақсатында: төрт әуе желісі қалпына келтірілді, сондай-ақ жер астымен екі резервтік кабель желісі тартылды.
— Жаңартылған нысан қалалық инфрақұрылымның су тасқыны қатеріне төзімділігін жақсартып, қалалықтарды тұрақты ауызсумен қамтамасыз етпек, — деп атап өтті өңір басшысы.
Резервтік су жүйесі
Заманауи жабдық енгізілгеніне қарамастан, сорғы станциясы — қаладағы ауызсудың жалғыз көзі. Су жүйесінің сенімділігін арттыру мақсатында Ойқала шағын ауданында резервтік станция салынбақ. Бұл жоба қолданыстағы тәуекелдерді жойып, су инфрақұрылымының тұрақты жұмысын қамтамасыз етеді.