Транспорт сферада надзор этиу жаны бла федерал службаны Шимал Кавказда бёлюмюнден (Ространснадзор) «Внимание, переезд!» деген айлыкъ жумуш бардыра тургъанларыны юсюнден билдиргендиле. Ол бу айны биринчисинде башланнганды. Аны кезиуюнде темир жолланы юслери бла башха жанына ётгенде сакъ болургъа кереклисини юсюнден айтылып турлукъду.
Быллай жерледе бегирекда жамауат транспортну жюрютгенле эсли болургъа керекдиле. Нек дегенде кёплени саулукълары, бирде уа жашаулары да аланы къолларындады.
Темир жолну бирси жанына ётерден алгъа улоуну тийишлисича элтирге, заманны тергерге, ол сунмай тургъанлай алайда тохтап къалыргъа боллугъун да ойларгъа керекди. Аллында баргъан машинагъа уа жууукълашыргъа керекмейди, ол бузулуп тыйылса, темир жолну юсюнде къалып къалмаз ючюн.
Келе тургъан поездни аллы бла чартлап ётерге да кюрешмегиз! Ол нечик терк келгенин, къалай узакъда болгъанын ангылагъан къыйынды. Андан сора да, аллай транспорт терк тохтаялмазлыгъын эсде тутугъуз.
Быллай жерледе водитель пассажирле неда телефон бла сёлешиуге бёлюнмезге керекди. Шлагбаум ачылып тургъанлыкъгъа, светофорну къызыл чырагъы жаннган эсе, темир жолгъа чыкъмагъыз; бирси жаны жабылса, ары-бери ычхыналмай, алайда къалып къалыргъа боллукъсуз.
Улбашланы Мурат хазырлагъанды.
Источник: https://zamankbr.ru/node/16311
