Цхинвалы скверæн лæвæрд æрцыд зынгæ ирон минæвары, Хуссар Ирыстоны æххæстбарджын минæвары Турчы Хъаныхъуаты Ремзийы ном. Ацы хабар хъусын кæны Sputnik.
Мадзал арæзт æрцыд политикон архайæджы гуырæн боны номыл – 5 апрелы Ремзийыл сæххæст уыдаид 70 азы. Йæ цардæй ахицæн 2020 азы декабры.
Хуссар Ирыстоны сæйраг сахары скверы дыццæджы æрæмбырд сты Хуссар Ирыстоны фæсарæйнаг хъуыддæгты министр Медойты Дмитрий æмæ, республикæйы президенты æвзæрстыты æхсæнадæмон цæстдарджыты хуызы чи ис, уыцы туркаг ирæттæ. Хуссар Ирыстоны фæсарæйнаг хъуыддæгты министрады сæргълæууæг Медойты Дмитрий журналисттæн куыд загъта, афтæмæй Путины уынджы скверæн Хъаныхъуаты Ремзийы ном раттыны уынаффæ рахаста горæты мэри.
«Ахæм хуызы нæ бафæндыд йæ ном сæнусон кæнын, цæмæй горæты хуыздæр сквер йæ номыл уа», – загъта уый.
Æрбацæуæг адæммæ баздæхт Хуссар Ирыстоны фæсарæйнаг хъуыддæгты министрады минæвар Туркаг Республикæйы Хоситы Бурхан. Куыд фæбæрæг кодта, афтæмæй мадзал æвдисæн у туркаг ирæттæм æмæ Хъаныхъуаты Ремзийы бинонтæм ахастæн.
«Æз Интернеты ныммыхуыр кæндзынæн абоны боны видео æмæ къам, цæмæй йæ феной туркаг ирæттæ дæр æмæ Ремзийы бинонтæ дæр», – загъта Хоситы Бурхан.
Лæвæрд æм æрцыд бардзырды къопи Цхинвалы скверæн Хъаныхъуаты Ремзийы ном раттыны тыххæй.