Юная пастаўчанка прадставіць Віцебшчыну на першынстве Беларусі па шахматах сярод дзяўчынак ва ўзросце да 12 гадоў. Гэта стала магчымым пасля перамогі на абласным першынстве па шахматах сярод спартсменаў ва ўзросце 12 — 18 гадоў, у якім прымалі ўдзел больш за паўсотню юнакоў і дзяўчат з Віцебска, Наваполацка, Полацка, Оршы і Глыбоцкага раёна.
Цікавая i напружаная барацьба разгарнулася сярод дзяўчынак. На старце выхаванка клуба «Ветразь» Пастаўскага раённага цэнтра дзяцей і моладзі Ева Іванова (на фота) атрымала пераканаўчую перамогу над Палінай Канапелькай з Глыбоцкага раёна, а пазней змагла нейтралізаваць атакуючы патэнцыял віцябчанкі Сафіі Сафонавай i пасля трох тураў выйшла ў групу лідараў.
У наступных турах жараб’ёўка звяла шахматыстку з вопытнымі саперніцамі. Урэшце, набраўшы 4,5 ачка з сямі магчымых, у сваёй узроставай катэгорыі чэмпіёнкай вобласці стала Ева Іванова, якой трэба будзе змагацца на рэспубліканскім узроўні.
Фота з асабістага архіва Евы ІВАНОВАЙ.