З восені 2017 года, калі ў браслаўскім касцёле Нараджэння Найсвяцейшай Дзевы Марыі зноў загучаў арган, храм стаў і месцам далучэння жыхароў краю да высокага мастацтва.
Магутны голас інструмента суправаджае святыя месы і два-тры разы на год служыць музыкам на канцэртах. Тут іх давалі вядомыя арганісты краіны, заезджыя майстры, выкладчыкі і выпускнікі Беларускай дзяржаўнай акадэміі музыкі. З ліку апошніх у ліпені міні-канцэрт твораў Фелікса Мендэльсона-Бартольдзі, Аляксандра Гільмана і Макса Рэгера прагучаў у выкананні Елізаветы Марозавай і Калінікі Мядзведзевай.