Ақтөбе облысында үйлену тойы қарсаңында қара жамылған отбасы үлгілі, ортасына сыйлы еді, дейді ауыл тұрғындары, деп хабарлайды SputnikNews.kz.

Еске сала кетейік, қайғылы оқиға Темір ауданының Шұбарши ауылында сенбі күні болды.

Полицияның дерегінше, әуелі 63 жастағы анасы өзіне қол салған. Мұны тауып алған 28 жастағы ұлы да сөзге келместен суицид жасаған. Сол сәтте үй ішінде отағасы және басқа да туысқандары болған, деп хабарлады "Астана" телеарнасы.

Ауыл тұрғындары болған жайтқа әлі күнге сене алар емес. Отбасының жалғыз ұлы жуырда ғана келіншек әкеліп қуантып, енді үйлену тойының қамына кіріскен еді дейді.

"Анасы 63 жаста еді ғой. Гүлзия марқұм жақсы адам болатын, екі қыз, бір ұл өсіріп, өнегелі отбасын құрды. Ұл өте тәрбиелі. Намаз оқитын. Менің балаларымның досы ғой. 19-да той болады деп кәдімгідей дайындалып жүрді. Келіншегін 3 қыркүйекте әкеліп қойды. Енді той істейін деп жатқанда осылай болды, үйде не болғанын білмеймін", - дейді Шұбарши ауылының тұрғыны Ардақ Құбашева.


Полицейлер қазір қанды оқиғаның себеп-салдарын анықтауда.

"Осы деректер бойынша Қазақстан Қылмыстық кодексінің 105-бабына сәйкес қылмыстық іс қозғалды. Өлімге не себеп болғаны анықталуда", - дейді облыстық ПД баспасөз қызметінің жетекшісі Ерболат Сарқұлов.