"Ўтмишдан эртаклар" — ўзбек адабиётининг забардаст вакили бўлган Абдулла Қаҳҳор ижодий меросида муҳим ўрин тутади. Бу асар нафақат ёзувчининг болалигидан ҳикоя қилади, балки ўтган аср бошларидаги миллат болаларининг машаққатли ҳаёти хусусида сўз юритади.

Ўзбек адабиётига ҳикояси билан кириб, моҳир ҳикоянавис даражасигача чиққан Ўзбекистон халқ ёзувчиси Абдулла Қаҳҳор қаҳрамонлари ўқувчи учун қадрдон ва ардоқли. Мутолаадан кейинги танаффусда Унсин учун қайғурамиз, Туробжоннинг хотинига анор илинамиз, Қобил бобога таскин бергимиз келади, Минг бир жонли Мастура ва унинг вафодор эри Акромжонга ҳавас қиламиз. Содда ва камтар инсонлар сизни суҳбатга чорлайди.