19 жастағы жігіт Алматы облысы Текеліде суға батып бара жатқан үш жасар қызды құтқарып алды, - деп хабарлайды Tengrinews.kz аймақтық ТЖД баспасөз қызметіне сілтеме жасап.

11 мамырда сағат 18.39-да бірнеше бала ересектердің бақылауынсыз ағысы қатты Кора өзенінің бойында болған. Салдарынан 2017 жылы туған қыз абайсызда суға құлап, оны ағыс алып кеткен. Суға батып, ес-түссіз жатқан қызды екі жігіт байқап қалған.

"2001 жылы туған Жарқынбеков Дәурен еш ойланбастан суға секіріп, қызды жағаға шығарды. Сол жерден өтіп бара жатқан, 1966 жылы туған азаматша Падалкина Елена Юрьевна тыныс беру мен жүрекке жанама массаж жасау арқылы қызға алғашқы көмек көрсеткен. Осылайша олар үш жасар қыздың өмірін құтқарып қалды, сол үшін оларға ведомстволық наградалар ұсынылады. Құрметті ата-аналар, балаларды су маңында ересектердің қарауынсыз қалдырмауды өтінеміз. Балалар қауіпті түсінбейді және бұл қайғылы жағдайларға әкелуі мүмкін", - делінген ТЖД хабарламасында.